Շոշկա վանքը գտնվում է Մսմնա գյուղից հյուսիս-արևմուտք և Գավախան գյուղից հարավ: Սբ. Ստեփանոս եկեղեցին, համաձայն արձանագրության, կառուցել են Ուսեփ և Գևորգ վարպետները 1651թ.-ին:
Դա միանավ բազիլիկ է` կառուցված տեղական քարից: Հնում եկեղեցում պահվել են երկու ձեռագիր սաղմոսների ժողովածու և Ավետարան՝ մագաղաթի վրա: Տեղանքի մանրամասն ուսումնասիրություններից պարզվել է, որ այստեղ դեռ վաղ միջնադարում եղել է քրիստոնեական կառույց:
Եկեղեցու շենքի չափերն են՝ 9,19 x 6,25մ: Ուղղանկյուն աղոթասրահի արևելյան մասում գտնվում է խորանի ապսիդը: Կամարակապ ծածկը հենվում է զույգ մույթերի վրա: Եկեղեցին ունի խաչաքանդակներով զարդարված խորանային բեմ, երեք պատուհան, գավթի հետ միացնող դուռ՝ արևմտյան մասում:
Վանքը հիմնահատակ ավիրվել էր թուրք հրոսակախմբերի ձեռքով: Ներկայիս եկեղեցին վերակառուցվել է XVIIդ.-ում, այնուհետև հիմնովին վերանորոգվել 1999թ.-ին: Պատերի շարվածքում օգտագործված են հին կառույցների քարերը:
Եկեղեցու շրջակայքում կարելի է տեսնել ավիրված շինությունների հետքեր, որոնք հավանաբար բնակելի և տնտեսական սենյակներ էին:
Շոշկա վանքից բացվում է մի հրաշալի տեսարան Վարանդա և Ամարաս գետահովիտների վրա: Ինչպես նաև վանքի տարածքից երևում է Շուշի քաղաքը: Վանքի բարձր դիրքի շնորհիվ, այն կարելի է նկատել շատ մեծ հեռավորություններից:
Հայաստանի լուսանկարներ
Տուրիզմ և երթուղիներ
Երգեր
