Սուրեն Սաֆարյան

Սուրեն Սարգսի Սաֆարյանը ծնվել է 1923թ. օգոստոսի 21-ին Բաքվում: Նա հայ նկարիչ է։ ՀՍՍՀ ժողովրդական նկարիչ (1977)։ ՍՄԿԿ անդամ 1950-ից։ 1942-ին ավարտել է Երևանի Փ. Թերլեմեզյանի անվան գեղարվեստական ուսումնարանը, 1952-ին՝ գեղարվեստական ինստիտուտը։

1962-ից դասավանդում է Երևանի գեղարվեստա-թատերական ինստիտուտում (1978-ից՝ պրոֆեսոր)։ 1969–1982-ին եղել է Հայաստանի նկարիչների միության վարչության նախագահը։ Առաջին շրջանի գործերը կրել են Հայրենական պատերազմի մասնակից նկարչի վերհուշ-տպավորությունների կնիքը («Հայրենի մեղեդիներ», 1956)։ Պատերազմի թեման արտահայտվել է Սաֆարյանի ստեղծագործական կյանքի տարբեր շրջաններում («Ազատարարները», 1960, «1945-ի գարնանը», 1964, նշված երեք աշխատանքի համար պարգևատրվել է Վ. Գրեկովի անվան արծաթե մեդալով, 1971, «Կռունկներ», 1979)։ 1960-ական թթ. վերջերից ավելի հաճախ է անդրադարձել մարդու և ժամանակի, ընդհանրապես հայ ժողովրդի պատմական ճակատագրի թեմային՝ «Հանուն գալիքի» (1960), «Սայաթ-Նովա» (1963), «Տաթևի ողբերգությունը» (1967), «Լեռների պարը» (1972), «Հինավուրց հուշարձաններ» (1973), «Եռանկյունի նամակներ» (1980)։

Սաֆարյանի գործերին բնորոշ են քաղաքացիական շունչը, բանաստեղծական նուրբ ինտոնացիան՝ համակված պլաստիկ ձևերի ու գունաշարի հուզաարտահայտչական տարրերով։ Ստեղծել է նաև դիմանկարներ («Եղիշե Չարենց», 1959, «Ձկնորս Արշակը», 1962, «Պարտիզպան Մանուկյանը», 1966, «Սիկեյրոսը Հայաստանում», 1973), բնանկարներ («Չինար», 1963, «Գարուն», 1969, «Արարատը գարնանը», 1971), արտասահմանյան ճանապարհորդությունների թեմաներով գեղանկարչական և գրաֆիկական գործեր, կատարել գրքերի ձևավորումներ։ Մասնակցել է հանրապետական, համամիութենական և միջազգային ցուցահանդեսների։ Անհատական ցուցահանդեսներ է ունեցել Էջմիածնում (1969), Լենինականում (Գյումրի), Դիլիջանում (1970), Երևանում (1974, 1981), Մոսկվայում (1981), Սիրիայում (1982)։

Սաֆարյանի գործերը գտնվում են Հայաստանի պետական պատկերասրահում և նրա մասնաճյուղերում, Տրետյակովյան պատկերասրահում, Արևելքի ժողովուրդների արվեստի թանգարանում։ ՀԿԿ Կենտկոմի անդամության թեկնածու (1975-ից), ՀՍՍՀ VIII և X գումարումների Գերագույն սովետի դեպուտատ։

Պարգևատրվել է Աշխատանքային կարմիր դրոշի և «Պատվո նշան» շքանշաններով։